“O‘zcharmsanoat” uyushmasi raisi A.Sultonov Misrning O‘zbekistondagi elchisi Tamer Hammad bilan uchrashuv o‘tkazdi. Muloqotda ikki tomonlama hamkorlikni rivojlantirish, charm sanoatini modernizatsiya qilish va yangi investitsiya loyihalarini amalga oshirish imkoniyatlari muhokama qilindi. Shu bilan birga, savdo-iqtisodiy aloqalarni kengaytirish, eksport-import masalalarini muvofiqlashtirish, ikki mamlakatning charm sanoati sohasidagi istiqbolli dasturlari haqida fikr almashildi.

Misr elchisi charm sanoat sohasidagi hamkorlikni rivojlantirish O‘zbekistonning charm sanoatini jahon bozorida raqobatbardoshligini oshirishga xizmat qilishini alohida qayd etdi. Misrning o‘zining charm sanoatidagi ish tajribasi va texnologiyalari, O‘zbekistondagi barcha sharoitlar bilan birlashganda, muvaffaqiyatli investitsiya loyihalarini amalga oshirishga yordam beradi.

Yanvar oyida O‘zbekiston charm sanoati korxonalaridan iborat delegatsiyaning Misrga tashrifi, shubhasiz, ikki mamlakat o‘rtasidagi savdo va iqtisodiy aloqalarni yana-da mustahkamlab, har ikki tomonning iqtisodiy o‘sishini rag‘batlantiradi. Bu tashrif o‘zining strategik ahamiyatiga ko‘ra, O‘zbekistonning charm sanoatini jahon bo‘yicha yangi bosqichga ko‘tarish va mamlakatning eksport salohiyatini oshirishda muhim rol o‘ynashi kutilmoqda. Bundan tashqari, O‘zbekistondagi charm sanoati korxonalari Misr bozoriga kirish imkoniyatiga ega bo‘ladi. Shu bilan birga, Misrning xalqaro brendlar bilan bo‘ladigan muzokaralar yangi texnologiyalar, ishlab chiqarish sifatini oshirish va mahsulotlar miqdorini ko‘paytirishga olib kelishi mumkin.